Hringtu ka nu philh lonak caah
By : Danny patawn
11may, 2012
March thla 8 thal chuah ka te khi asi. Fiak fai va nih zinglei khuadei
lai cun tlangkip in an awn. Cu nih cun thinlung a hlau. Khuaza a culter i.
ruah mi a tamterhringhran. Thing hnah no tete an corh pah cang hna.
Tlang kip ah minmei an i zel.Saram phuntling nih tthalcan an lomh
lawng silo. Thingkung le pangpar hna zong nih an par dawh he thalcan
an lawm. Minung zong nih thalcan chuah i, hawikom rual he ti ngahring
dawi le tlonlen kha i ngaih tuk ciomi asi. Nain, hi kum hi kumdang
bantuk silo.
Zanlei suimilam 6 hrawng ah si. Baptist biakin pi in thihdar tum thawng
nih khuapi a cul. Kan khuachung ah zeithil dah a cang tiah mikip an mit
au a phiing. Kan hawinu i,hringtu a nu, a thi tiah theihter nak dartum
thawng a rak si. Thih dar vialte lak ah hringtu nule thihnak darkhing
thawng nih hlah maw, mi thinlung a khehkhuai bik ti awk in.A zan cu in
khat in khuami nih an topi hna.Cu zan i mithi hla (Mizo hla ) an sak mi nih
ngeihchiat a zualter chin .Aw,, Van mithiang hna lennak khi ka hei cuan i,
khi hmun ah a phan cangmi khamh ciami hna nih cun ttah hram nak nih
a khuh mi vawlei hi cu dih cang koseh… timi hla an sa. A nu ke tlaih pah in
ka nu.. ka nu…kan sianglo tiah a fanu ttah thawng nih chum bang an in a
zelh. Topi tu vialte hla hmanh an sa kholo.A kilte ah khin ka rak tthu i,
a thli in ka rak ttap len ve. Kan rak hngakchiat rih caah zan suimilam 10
hrawng ah khin ka rak lawi.
A thaizing cu a fanu nih zeitluk i, a sianlo zong ah vui lo awk a tha tilo.
Thlan hmun ah mi vialte nih mitthli he an thlah.Hi thlan hmun hi vate
ka rak pel tawn ah thlanlung pakhat hnu pakhat per ka rak i zuam . Hi
hmun ah mitthli zeizat dah a luang cang tihi ruah awk ka rak thei ballo.
Hi kan hawinu i, a sianlo a nu ruak kan thlah hnu lawng in kai fiang.
Mithli he roca an tialmi thlanlung, duhpoh in ka rak lamh le ka rak per
mi kha khirh dih ka duh than.
April thla a chuak tthan cang. Fa le caah nichiar lo a kalmi hringtu nule
don lai hi kan rak i ngaih tuk tawn. Kan hnu thla ah a nu nih a thih tak
mi kan hawinu le tiin kan nule hmun khat ah kan rak dong tawn hna !
Zarhte ni zanlei asi. Nikhua atha. Nitlak lei tlangcung ah ni a liam deng
cang. Kan nule ngahring dawi mi, don kan i tim hna. Kan hawinute
zong cu kan sawm ve. Kei cu donding nu ka nei tilo a ti. Nanmah lawng
va kal ko uh a ti nain, kan hnek chih i, a rak ra ve. Kan nule an rak tlun
kan hmuh cun kan tli thluahmah.Kan i lawm tuk hna. Donding nu a nei
tilo mi kan hawinu kan tlik tak dih. Kan philh.Kan nule kut kan i tlaih
pah khin thanuam ngai in kan rak kir hna. Kan hawinu te cu a rak ttap
ciahmah. Ziah na ttah ? Kei cu donding nu ka nei tilo.
Cuhlan ah cun hika hmun hi ka rak don tawn nak asi. A tu cu ka sianlo
ka nu kut i tlaih ding kei cu ka nei tilo..In phak tiang ngol hngal loin
a ttap..
Hngakchiat lio ah cun nule pa neilo, ngakttah fa hi nehsawh le zeirello
an tong khun. Khua awng zong an tong kholo. Pupa nih ngakttah khua
awng tonglo an ti. Zei an tuah hmanh ah hlawhtlin a umlo ti awk asi.
Mi hnu ah an i thlai. Hawi an tluk kholo. Hiti ruah ah cun hi bantuk
vanchiat a tongmi fale hna hi Pahtian thluachuah a dong khun ding
an si nain.An mitthli tlak can a tam. Hiti dawtu nule nih kaltak mi fa
serhsat an ton can ah hin cun an thinlung nih zeitluk khin maw an
nule an hlam tawn hna hnga ! Nihin tiang ka nu ti awk ka neih rih
mi hi ka van a va ttha hringhran dah ! Ka lawm tuk ee ka nu.
Kum zeimawzat aliam cang nain November 27 zan cu atu tiang ka
cinken ko rih. Zingleitiang hngilh loin sivang in ka rak um. Hiti
hngilh kolo i ka rak um hi ngeihchiat nak thil pa khatkhat ka ton
ruang ah silo. Ka chung le nih an ka sik ruang zong ah silo. Nungak
ruang zong ah silo. Hawikom ruang zong ah silo. Cawn nikhat ni
siangin kai ka huamlo tuk ruang zong ah silo.A ruang zeihmanh
umlo in mahtluk in ka rak i hngilh khawh hngalo !
Zan hngilh khawh lo tihi ka rak nei ballo. Hi zan kai hngilh khawh
loning cu sivang khi asi.Zan a tlai i, ka mitthli hnawh cawk si tilo.
Ka thinlung kehkuai dih ai tim.Ka thaw hmanh ka chuah kho set tilo.
Ka mitthli luangmi nih ka biang in ka hngawng ah an luang. Cu
mitthli nih cun ka angki hngawng vialte a ciarh dih.A luanciami
can chung ah a nu nih a thih tak mi kan hawinu kong ka ruah ah ka
ngeihchiat a zual chin. Nu neilo in hei um ve ninglaw ka ti, cuvial ah
cun ka mitthli nih a zulh.
Hiti hngilh kholo le mitthli he zankhua ka dei mi hi zeidang ruang
ah silo. Nihin ah ka hawinu bantuk in ka nu nih rak ka thih tak ve
sehlaw ti ka ruah ruang ah ngol hngallo in ka ttah nak a rak si.
Cuti ka ttah cu ka mawh maw ? Ka mawh lo. Hringtu nule i zungzal
kaltak ding cu a ho nih dah a celh lai! Cikkhat khualtlawng ding kan
thlah hna hmanh ah kan ttap tawn silo maw ! Vawlei nunchung ah
ka nu ti awk neih tilo ding cu ruah vial hmanh ah thinlung nih a celh
lo.Zeicatiah nule tluk in dawtu vawlei ah kawllen zong ah ka hmu
ti lailo .
Nihin ah cun hringtu ka nu a derthawm ngai cang. Fale caah a tha
zaang vialte a dih dih cang. Chiah ret mi a nei tilo. Thlanmual lei ah
nikhat hnu nikhat in a ke a hlan ciahmah. An i hlat tilo.Nain , nihin
tiang thing a phur cuahmah rih. Ka fale ramdang ah mi salrian nan
tuan. Thing ka phurh mi te hi kei nih kan bomh khawh mi hna asi.
Ka fale thing tih ding tiang cawk ding cu nan rethei tuk lai a ti .
Hringtu nu le nih fale cung ah dawtnak an neih mi le fale nih nule
cung ah dawtnak an neih mi cu Rili le a cung ah a kalmi vok kuang
lawng bantuk in an lianh fat ning an i dang. Oh Mother ! Your sea
is so great and my boat is so small.
Cu tluk in a ngan mi dawtnak a neitu hringtu ka nu caah nihin
tiang zeidah ka tuah ? Ka fale hi ka damnak sittha bik nan si a ti
tawntu ka nu kha lakphak ti hmanh duhdim in ka dinter kho maw ?
Ka kal khawh lo caan ah a thilrit cung ah khinh in lamchosang ah
sei in a ka phurtu, hringtu ka nu kha zei sii dah a thazaang caah
ka dinter ? Nungak len ka lawi chiarte, ih lai ah ka din piak mi a
arti man hmanh ka nu caah ka chuahpi maw ? Nihin tiang hringtu
ka nu caah santlaih nak ka neih lo mi ka ruah ah ka nu hmai ka
khaap lo.
Nule dawtnak cu a luangmi tivapi bantuk asi. Fale hna cu, cu dawt
nak tivapi chung ah a tlongleng mi thilnung bantuk kan si. Hringtu
nule dawtnak cu fale nih kan theihkhawh mi le kan chim khawh mi
nak in let tampi in a ngan rih. Can an liam i, hringtu nule dawtnak
nikhat hnu nikhat in a thlum chin.