Herod Siangpahrang .. Herod the Great...
Danny patawn
12 December 2011
Vanbawifa Bethlehem Caw rawl ei nak kuang i, a chuah lio ah khan Judea ram siangpahrang hi Herod Lian ( Herod the Great ) a rak asi. Kumhnih tang hngakchia pa a simi poh thah dih ding ah nawl petu asi. Kan Bawipa Egypt ram ah kan mah bantuk ralzam dirhmun ah a dir tertu zong asi fawn. Hi ruang ah hin kan Bible hmun dangdang ah a min hmuh awk a um setlo nain, mi thinlung ah a min a langsar ngai . Krifa mi hna nih cun Herod a theilo mi cu kan um lailo dah ! A min lawng theih asi i, a konglam Bible ah a lang tilo. A tawinak tein zoh hnik hna usih.
Herod chuah keh nak
Herod a pa hi Antipater asi i, uk nak lei ah bawi ngan ngai asi. Upa cem changtu asi. BC 74 ah Jericho, Samria ah a rak chuak. Hi a chuah nak Jericho hi vawlei cung ah khuahlun bik asi lai tiah ruah mi asi. Jericho an tlak nak hi kum 11000 hrawng asi lai tiah vawlei lei thil hlun kawl pawl nih an tuak ning asi.Jordan tiva pawng ah a um. Rili thi in Km 16 a hlat.Minung thongkul renglo deuh an um.Rili nak in a niam mi khua asi. Herod hi Kum 25 asi ah Galilee ramkulh ah ram uk bawi Governor a rak ttuan i, a upa Phasael hi Jerusalem ah ram uk bawi Governor a ttuan ve. Herod kum 31 asi ah a pa cu poison in an rak thah. Cu a that tu hna cu Herod nih a hnu ah a thah dih ve hna. Tuanbia tial lei ah Judah mi minthang ( Jewish historian ) Josephus nih Herod hi ku 37 chung siangpahrang a rak tuan tiah a tial.
Herod nupi le a fale
Herod hi theih khawh tawk ah nupi pahra hrawng neih dawh asi.
1. Doris he fapa pakhat an nei i, 4BCE ah Herod nih a thah.
2. Doris he an i umh buin Hasmonean Alexandros fanu Mariamne a tthit i, fapa 2 le fanu pahnih a neih hna.A fapa le hna cu an pa Herod nih an pahnih ning tein a thah hna. A fapa Alexandra hi 7 BCE ah a thah. Aristobulus zong, hi kum thiamthiam ah a thah ve.Midang a chungkhat sahlawh zong tamlak te a thah hna. A nupi Meriamne zong a thah rih. Sual zong ah hin a cin le tawk a um. Hi bantuk misual hi cu Laimi kan ruah ning in cun sarthih in thi ve ding asi nain.
3. A nupi le dang hna cu..
Malthace, Cleopatra of Jerusalem, Pallas, Phaidra, Elpis le an min theih khawh lomi pahnih an um.A dihlak ah nupi pahra hrawng a thih tiang ah a nei ti asi.
Mah chung chuak, thi le sa in hrin mi fapa le saram bang a thah ning hna ruah tik ah Joseph le Mary nih kan Bawipa Egypt ram i an zam pi kha zampi lo awk ttha a silo. Hi lio siangpahrang Herod cu minung thinlung a nei fomlo cu ta..
Herod thih nak
Misual cu sau an nung lo, an thih hmanh ah hawi thih in an thi lo, thih chia in an thi ti asi tawn nain Herod hi a chan asau ngai. Lailei sining in cun tar thih in a thi ti ding asi. Kum 70 asi ah a thi. A thih hnu ah a ram cu hmun thum ah ai tthen i, a fapa le pathum nih an uk. Hi a fapa pathum lak ah Bible chung min lang bik hi Herod Antipas asi. Tipil petu Johan phungchim lio hrawng ah khan Galilee peng uktu asi. Lang ak nih a rang in fa a hringlo an ti bang, a pa nak hmanh in a sual deuh lai dah! Tipil petu Johan lu tantu kha Herod Antipas hi asi. Cu caah cun Jesuh zong nih Herod Cenghngia ( Herod the Fox ) a rak ti nak kha asi.
Herod Lian ruak an vui nak Herodium cu a tang i hi asi.
Herod hi march thla dih lai / April thla thok ka, BC 4 hrawng te ah a thi. A ruak hi Bethlehem khua pawng Herodium ah an vui. Hi an vui nak hmun hi a mah siangpahrang tthutnak hmun asi . Jerusalem in Km 12 a hlat i, thlanglei ah a um. Hebrew University i, an mithiam minthang ( professor ) Netzer hruai nak in may 7, 2007 ah Herod thlan hmun hi an hmuh. Judah tuanbia tial nak ah minthang ( Jewish historian ) Josephus nih a rak ttial nak Herodium ah an hmuh nak cu asi.Hi thlan hmun an kawlnak ah hin kum 35 an rau.A thlan cu an hmuh nain,minung ruh ro belte an hmulo. Herod hi kal zawt nak a neih pin ah depression zong a neih chih. Hi zawtnak hi ai thih pi mi zawtnak asi tiah tuanbia thiam mi hna nih an ttial.
Misualpa Herod Lian thlan cu mah hi asi.
Vawlei kan thilrit le Herod lungput chia ta in Bethlehem lei khi hei cuan hna usih……tiah careltu dihlak kan sawm hna…….
Danny patawn
