Nihin cu February 14,Valentine’s day asi. A daw mi hna caah ni sunglawi asi bantuk in a tang capar te hi dawtnak ti a halmi hna caah …..
Dawtnak vanchia
Jameslory & Hurry nylon
By : Danny patawn
14th, Feb 2011
I
Siangpahrang hna chan lio asi. Hi lio siangpahrang hna nih hin vawlei cung ah zeitluk in dah ka min a than khawh lai tiah an i zuam . A bik in pangpar dum minthang bik neih hi an i zuam bik mi cu asi. Vawlei cung ah ka pangpar dum hi minthang bik seh tiah siangpahrang hna nih salhna hmang in an i zuam bantuk in an pangpar dum hna cu zoh cimlo an si. A chung i a tlongleng mi hna cu dum chung pangpar rim le, thlang lei in chak lei ah a hrang tawn mi zandai tang zilthli nih an thinlung ti bang a kih ter hna I, vawlei ah an phurh mi ngeih chiatnak, zuun an tuar nak le lungretheihnak vialte an philh dih tawn hna.Nitlak lei siangpahrang pa dum hi vawlei cung ah minthang bik asi.Fanu pakhat a nei.Mah hi dum chak lei tlang ah hin khuasik can zong ah a hnah a tthil ballo i, kumtluan in a hring zungzal mi thingkung nganpi a um i, thal can chuah poh ah cu thing cung cun fiakfai va khing riahmah in a hram tawn , cu nih cun nungak nu thinlung ah zei te khi dek chambau sehlaw a lawhter..A mah zong nih a chimzia a thiam lomi pinlei ah khin…
Siangpahrang fanu Hurry nylon hi zan thlapa a van can ah hin a pa dum chung ah cun a leng tawn. Mi dawh, minunnem asi pin ah siangpahrang chungkhar thinlung, mah i ti nak a nei ballo. Mi sifak le santlailo cung ah zangfah dawtnak a nei. An khua chung i, ei awk neilo mi a hmuh hna ah hin a ei hnga dingmi ei siang loin a thli in a va pek tawn hna. A pa le a fanu sining cu nichuah le nitlak bantuk an si.. Kum hnih tang hngakchia vialte a that dih tu hna Herod siangpahrang ko kha aa lawh ter, a rumra neih ning le a kut tang mi nih an hei ttih ning cu a mak.. A nu nih le an pa siangpahrang sinak cu i hmaihngal pi tuk kaw, Zisuh vailam ah thah ding in a petu Pilot nupi kha ai lawh ter ve . An pa nak in siangpahrang asi deuh.
.Siangpahrang an si bantuk in nungak nu cu mi nih an leng in an kom ngam lo i, a mah te lawng in a pa dum chung ah zantlai hnu tiang a leng tawn. Vawlei thilri, chawva vialte a pa in ah an tling nain a nun ah zei te khi dek a chambau mi um sehlaw a lo, a thinlung nih khin a hei hlam tawn mi um dawh asi. . An rumnak le an thawnthatnak nih a nun a hnem kho lo. Mi nih lengtu le komtu a nei lo i, an dum pangpar hna cu a hawikom tha ah an cang.Hi tluk in a lianngan mi le a rum mi inchungkhar in a chuak mi nungak nu hi zei khi dah a hei hlam tawn mi asi hnga ? Thilpuan, chawva, rumnak an si hnga maw? Si dawh asi lo. A lungkil in ti bang a hal tawn mi te um dawh asi ko.
II
Vawlei cung ah a rum mi nih ei cawk lo le din cawk lo in an neih lio ah anthur tihang hmanh duhdim in a ding kholo mi zong an tam. Khua pakhat ah chungkhar an um i, fapa pakhat ..James lory… an nei . An si a fak, mi duh lo rian kip tuan in a paw a cawm mi an si.An harsa ko nain micung ah dawtnak le zawn ruahnak an neih mi nih an muihmai a dawh ter.Nikhat cu Siangpahrang sin ah pek dingmi ngunkhuai an pek khawh lo ruang ah an chung tein hri in thlai I, thah ding in nawlpek nak ca a chuak.A zan cu an nu pafa rual in an I kup hna I, mitthli he thla an cam.Zei dang sualnak ruang ah asi lo, sifah santlaih lo ruang ah an chung te i, thah ding an si mi hi cu minung sinak in cun tuar khawh ding asi lo. Siangpahrang hna nawlneihnak cu a va lianngan hringhran dah ! Sifak hna cung ah zangfahnak a nei tu nungak nu Hurry Nylon nih khan thei sehlaw cu a nunnak tiang pek in a chanh ngam men ko hna hnga ,nain a thei kho fawn lailo. Zan a tlai i, an thihnak ni le can a nai chin. An vampang awng in zan thlapa ceu le thli kik nih a hranh hna zong ah an thlan fim a luang. Khuasik can asi ko nain, an caah cun chun nilin riantuan mi nak in an thlan tamdeuh a luang. An nih chung caah cun hi zan hi vawlei pi a rawk ni le van a cimh zan asi.
Ngol loin khupbil in daihnak Bawi sin ah thla an cam nain an thinlung cu a dai kho hlei lo, mei bang a lin. Zisuh zong Gethsemani dum ah thlan ti he thla a cam ko nain vailam ah an tah . Mithli he lungthin kek kuai in bawipa sin ah luatnak hal in thla a cam mi, hi hna chung hi bawipa nih cun a chanh taktak hna hnga maw ? Zisuh zong a nunnak luatnak ding ah Egypt ram ah an zam pi asi lo maw ! Hi zan hrim hrim ah hin an zulh dingmi lam an i thim a hau. Thla maw an cam peng lai asi lo ah hi siangpahrang tha lo Herod bantuk nih a pen lomi ram ah dah an zam lai ? Hi lam pahnih ah hin pakhatkhat an I thim can asi cang..
Kum zeimawcan an khuasaknak an in le an lo cu sianglo buin mithli he zamtak ding in an ihphah le an puan tete an i tim. Hi hna inchungkhar hi an si a fak ko nain dawtnak ah cun an rum, nifatin an nunnak ah bawipa thlachuah an i ham.Zei ruang ah dah misual thah cawk lo vawlei ah an um ko nain hi tluk in a nunnem mi hna cung ah hi bantuk thil hi a tlun tawn hnga tihi,ruah len awktlak asi. Pathian khuakhan ning hi minung nih cun theih khawh ding asi rua lailo. A sual mi le mihlen hmang pawl hna hi hawi hlei thlawchuah hmu le mirum khun hna an lo. Miding mifel hna le mi cung ah dawtnak a nei tawn mi hna cu hawihlei misual ah ruah an si pin ah thihnak dantatnak tiang pek an si mi kong ruah ah hin cun sertu pathian sin in nuar lengmang nak ding in a um tawn.
Thihnak ral ttih ah zam ding in an inleng par ah an pafa rual in an dir . Hi zan cu khua a dawm, khua a ri, ruah a siamsiam in a sur, muihnak nih an velchum vialte a khuh dih. Hi siangpahrang tha lo, tipil petu Johan lu a tantu Herod Antipas bantuk, misual kut chung in luatnak an hmuhnak hnga le a nunnem mi siangpahrang pen mi ram ah an phak khawhnak hnga, an lamtluan khuazing sin ah an ap. An chung tein inlengpar zan muihnak tang ah mitthli he thla an cam hnu ah nitlak lei ram panh in an zam.
III
An khual tlawnnak ni 17 nak ah tiva ngan ngai mi an phan. Cuka tiva pinlei cu siangpahrang dang nih a pen mi ram asi cang. Zanlei ni a niam cang i, cu tiva cu tan tilo in a kam ah an riak. Ke in zarh hnih leng chuk le cho lawng kal mi an si i, an tha a ba hringhran. Sertu bochan in khual tlawng mi an si bantuk in tiva kam these cung ah zinglei niceu damte an hmuh than nak hnga khup bil in thla an cam hnu ah ih zai an rel.. Vanmi hna nih hlah maw an thlim hna ti awk in an mit kuh a thaw hringhran. Zing arkhuan cut hrawng, an mitkuh thawt saling ah khin zanmang hmanh ah an manh ballo mi vanchiat nak tilian nih a van khuh thluahmah hna i, an chung te in a fenh hna. Chanh tu ngai in an ttap, an hraam. An pathum te cun a fenh riahmah ko hna. Lam har vialte an lonh cang i, thaizing in cun tiva khat lei ral ah kan phan cang lai tiah an i ruahchan mi cu san a tlai tilo. Hiti thil an ton lai hngalh ah cun an in le an lo tang te ah khan an nunnak cu rak dih ko sehlaw a tha deuh hnga.. Ti nih a fenh pah hna cun pakhat le pakhat bye bye an i pe hna , mitthli he thlahnak kut an thlir. Hringtu nu nih ka fa… hi hi maw vawlei i kan chuahchan cu asi, hiti i, nule fa i then cu a fak tuk, maw pathian kan ngaithiam tiah a tap.. Afapa zong nih cun ka nu kan sianglo, ziah hme pathian sin ah thla kan cam lai I, a kan khamh ko lai ka fa na ti tawn kha, thla kan cam mi bawipa nih a hngal rua lo, ka nu vawlei cung cu mu…. tiah, a aw neih dihlak chuah in a ttap ve, a pa zong nih cun dang khat in…Mah hi tiva kuang cu zei dang thawng theih ding a umlo, nufa hna ttah hram thawng dah tilo cu….
IV
Zinglei suimilam pa 7 hrawng si dawh asi. Tlangvalpa.. Jameslory.. a lung a fim ah cun thingphur ngan pi ah tilian nih a rak bah kha a van i fiang. A pawngkam a van zoh i, a dawtbikmi a nu a hei hmuh. A pa cu kawl len zong ah hmuh khawh asi tilo, tilian nih pialral ram ah kir tilo ding in a lanh pi cang. An nufa cun an i kup i, ttahnak thazang an neih lo tiang in an ttap.A fapa nih cun ka nu, kan thlacam nak pathian nih a theih i, tilian thawn nak chung in a kan chuah cang, ka thih tiang in kan dawt lai i, zei tik hmanh ah kan kaltak lailo,tiah a nu mitthli hnawh pah khin a van hnemh. A si nain, tilian nih a fenh hna lio ah bye bye tiah thlahnak kut an rak thlir lio i, an mitthli he khan cun a lo tilo, a tu cu lomhnak mitthli asi cang. Hnawh cawk loin an biang ah lomhnak mitthli a luang ko nain, a tu ah cun chungkhar an tling tilo. An i bochan bikmi an pa nih kir tilo ding in a kaltak cang hna. An mah nufa lawng mi ramdang, theih hngalh lo ram ah zei ti khin dah khua an hei sak ve te hnga mu…
Tiva ral a naih nak bik, siangpahrang dang nih a pen mi ram ah an nufa cun khua an sa. Mipem thar kan ti cu mi nih sawh le serhsat an ton can a tam. Dawtnak a rak lennak an in le chungkhar tling i len lio can , neh hnu liamcia nun an ruah can hin cun an mitthli hi an rawl ah a cang tawn.
Nifatin an nufa cun ramtang ah thing an hau i, meihol an raw. Cu an meihol cu khuakip ah an zuar . An nufa in meihol tun an i phurh i, khua chung lam an kal ah hin cun an za a long ngai tawn. Zei ca tiah cun minih an angki hnawm an kan neh lai ti phan ah lamhla piin an hrial tawn hna caah asi.
Thal chuah ka hrawng khi asi cang. Tlangvalpa nih hitin khua a ruat. Ka nu he nitin meihol rawh hin cun kan nun a thleng kho lailo, kan phaisa neih mi te khin thil ka caw lai i, khuakip ah ka zuar lai …A nu nih cun a ruat kholo, a fa he zankhat te i then hmanh asi kho in a thei lo. Saram hmanh nih a fa he zankhat chimlo,suimilam pakhat hmanh an then kho hna lo. Hringtu a nu nih hiti a ruah hi a mawh lo. Hmailei nuncan nak ding caah cun i sianlo zong ah i then a hau cuta.
V
Tlangvalpa cu second hand thilpuan le tyre kedan ( khai riat kedan ) pawl ai phurh hna i, khuakip ah a zuar. A thilzuar mi tete zong a tluang ngai. Cu ti cun thil cu a zuar lengmang i, cu hlan i meihol an zuar lio nak khan cun an nunning a van thleng deuh cang. A nu belte a derthawm cang i , riantuan kho asi tilo. Thlanmual lei a hoih pah cang.
Nikhat cu nungak nu Hurry nylon umnak khua a phan. Thil zuar kan ti cu mirum tangka nei deuh ding in poh cu hrelh lo in fuh asi . Siangpahrang hna in a va phan. An fanu Hurry nylon nih a zoh ah hin a zaang a fak, a sining vialte a hal hnu ah a thil zuar mi cu a cawk dih. Cu ni cu tlangval pa cu a lawm hringhran, a thil zuar mi a manh dih caah… Nain, siangpahrang fanu nih second hand le tyre phanah kha zeitin dah a tuah te hnga ti cu catialtu zong nih a hei thei kho tilo..
Tlangval pa cu rianrang in a kir i, thil a la tthan. Cu hlan i a zuar hmasa tawn nak khua ah zuar tilo in nungak nu umnak khua ah khan zei hlan cem ah a tli hmasa. Tuandeuh lio ah a thil a manh dih ruang ah asi lai, a lem ko rua. Tutan zong ah hin nungak nu nih cun a thil zuar mi a cawk dih. Hiti i,thil an i cawk pah ah nungak nu nih tuzan cu kan dum ah rak ra te tiah bia a cah ta.
A zan cu rawl hmanh khim in a ei kholo, a lungre a thei. An ramchung ralbawi nganngan hmanh nih an pal ngam lomi, siangpahrang dum chung i va luh ding a ruah ah a thaw hmanh ttha in a chuah kholo. Kal lo ding a ti ah a thil vialte a cawtu asi pin ah siangpahrang fanu bia cu al phung asi lo a ti, a thinsi a vang.
A thil neihmi lak ah a tha bik , a nu nih a tawka hmun hnih i, a belh piakmi a hruk I, nungak nu lennak dum ah cun a va kal. An dum chung a van luh ah cun a mang hlah maw ti awk in.A khuasik saisem an chuak. A mawh lo. Nungak nu muihmai dawhte a van hmuh le bang ah cun a thinlung ah khua a tur, Ttek a tla, Tto tho a hrang, a thintur a vamh in ai vam.
Nungak nu nih tlangval pa caah angki le bawngbi tha taktak mi a van chuah i, a hruk ter.Chaklei siangpahrang pennak tang i an um lio le meihol a zuar lio ah khan cun a ho hmanh nih zoh awk ah an rel ballo, a dawh ti awk zong an thei ballo.Hi zan cu a muisam a thleng. Pa dawh taktak a rak si kha hi zan ceo ah hin a lang. Hmundang siangpahrang fapa hlah maw a rak phan ti awk khin.Hi tlangval pa dawh ning hi cu catialtu nak in nungak nu nih a let tampi in a chim zia a thiam deuh theu lai.
VI
An dum laifang,a dawhnak bik ah thu in biaphun an tlinh. An ral tlang hei zoh ah ramriak mei ceu tete tthep delh malh in an ceu. Hi zan hi an nih pahnih caah cun nunchung philh khawh tilo dingmi zan ah a cang thai cang lai. Vawlei cung ralpi le nuclear hmanh nih kan then hlah seh an ti zan, a lianngan bikmi Nebukhanezar siangpahrang thawn nak zong nih kan then hlah seh an ti zan asi.Cu zan thok cun an thinlung ah dawtnak thlaici an tuh. Cu thlaici cu a kheuh i nunchung a par nak ding ah an pahnih in tuanvo an nei.
Zankhat cu hiti hin dawtnak bia an tiam. Cu zan cu zan thlapa zan dang nak in a vang khun. An dum chung pangpar hna zong zan dang nak in an i dawh khun, zoh cimlo an asi.Dawtnak bia tiam zan asi ruang ah asi rua. Nau bang an I pom pah in tlangvalpa nih hitin bia a kamh. Ka dawtbikmi Hurry nylon,… Umm…Nan dum chung pangpar hna hi hei zoh hna hmanh ! Hi tluk i a dawh mi pangpar hna nih hin an par an ttilh dih hlan le an uai dih hlan ah cun na tlangval Jameslory nih hin a ka dawt peng ko tihi zeitik hmanh ah van philh hlah mu..Ummm…Nungak nu zong nih cun,, Ka dawtbikmi Jameslory…Kan dum chak i, thingkung nganpi khi hei zoh hmanh …Umm,, khi thingkung nih khin khuasik can zong ah a hnah a tthil ballo, kumtluan in a hnah a hring zungzal. Khi thingkung nih khin a hnah a uai dih hlan le a tthilh dih hlan ah cun na nungak nu Hurry nylon nih hin a ka dawt peng ko ti hi zeitik hmanh ah rak philh hlah mu… Umm.
A daw mi hna caah cun zankhat hi suimilam pakhat nak in a tawi deuh mi a lo. Zan thlapa zong nih cun nitlak lei tlang cung a phan cang. An cung zawn i arfi run hna zong liam an i zal manh cang hna. Then i sianlo zong ah can nih cun zei hngal loin an liam. Zinglei ar zong an khuang deng cang lai.Tlangvalpa lawi ai zalh ah khin nungak nu nih lawi rih hlah,a tuan tuk rih,ka dawt… kan hmaitlang i ramriak mei ceu hna khi zinglei mei ceu an si rih lo, zan meiceu an ko rih..a van ti vial ah khin Deirel arfi a chung chuak . Zinglei ar an khuang.
VII
Vawlei cung cu kawlhawl nak ram asi bang in, tlangvalpa zong cu khua kip ah thil cu a zuar. Voikhat cu tiva kam ah a thu, a thilzuar mi a hngauh , a tha a ba ngai ko rua.A kenglei cu a thlan nih a angki zong a cinh dih. Zeitluk i a bat can zong ah a dawtbik mi kong a ruah can ah cun vanlawng a cit mi a lo. Mupi bang in a dawtmi sin ah thlarau in a zuang tawn. Zahan ka mang a tha lo e, ka dawt a dam lo sual hnga maw, a thawng ka theih lonak asau tiah khua a ruah lio ah khin tiva nih cakuat bawm pakhat a van fenh khi a hei hmuh. Zei dah asi hnga tiah a van on cu a dawtbikmi Hurry nylon , an ramchung ralbawi ngan bik he an i umhnak ding sawmnak ca a rak si.Hi lio chan ah hin sawmnak le thawng thanhnak ca pohpoh cu tiva fenh ter asi tawn. A fak tuk e ka dawt tiah tiva kuang khek in a ttap. Cu a ttah thawng nih cun tiva kuang a hei hrawn i, a dawtmi sin a phan. A thinlung nih a rak theih.Dawtnak nih a pehtleih ter cang mi hna cu an pum cu tiva pi nih dang ko hmanh hna sehlaw, an thinlung ah hin hngalhnak te hi a um tawn ko rua.Nungak nu nih cun ka dawt bik …a tu lawng maw ka sining na rak theih, Va bang in rak zuang law dawtmi ka sin ah tiah inkhan ah ngol hngal loin a rak tap. Nungak nu rawl a ei tilo nak zarh khat asi cang i,a rak der ngai cang.A dawtbik he thih tiang a then ding an si a theih hnu ah cun zeitin dah a ei khawh ti hnga ! Saram hmanh ngeihchiat an ton ni ah cun rawl an tam lo asi lo maw ?
Tlangval pa nih a thilri vialte kaltak in a dawtmi sin ah a tlik in a tli . Chun zan it loin ni 14 ke in a kal hnu ah an puaizan ah a va phan. Siangpahrang fanu va neih ni cu a ramchung bawi le minthang an tling. An puai tuah thawng le au khuan thawng nih an khua zung a tlirh dih. Ramchung mi vialte lomhnak in an khat. Nungak nu cu a kil te ah khin thu in , inka I a rak lut mi kip khi a ngiat hna, mi pakhat luh thawng a theih poh ah ka tlangval asi cang hnga maw a ti ! Ramchung bawi lian vialte nak in second hand le khairiat kedan zuarpa kha a thinlung nih a hlam mi cu asi . Tlangvalpa zong cu a phan ko nain, a mah bantuk sifak mi hna cu siangpahrang puai chung ah luhnak nawl an pe hna lo. A sivangh le lungfah tuk ah nungak nu i, bia a rak kamhnak thingkung nganpi kha a va zoh. Cu thingkung cu zandang nak in a hnah an hninghno i, a dawh zong an i dawh khun. Aw…ka dawtbik nih hin a tutiang hi a ka dawt peng ko. Zei dah kan ton ka dawt tiah a dawtmi biakamnak thingkung cu a dawtmi can ah aa kuh i, a tap .. A dawtmi Hurru nylon zong nih cun ka dawt bik mi ka tlangval bia ka rak kamhnak thingkung kha tuzan ah hin zei dah a lawh hnga ka va zoh lai tiah a va kal..A dawtbik a rak ttah len ko kha a hmuh..Cu biakam nak tang ah cun zei can kan i pom ti hmanh hngal lo.....
VIII
Puai chung ah nungak nu a um lo kha a pa nih a theih tik ah a ran nak in kawl a fial hna. Cikkhat ah an khua vialte an cul dih manh. Thingkung tang I mitthli he a pom mi cu an va hmuh hna.Siangpahrang pa a thinhan cu Chiandeih bang, a hrum hlah maw ti awk in. A tlangval pa cu thong an thlak colh. A thaizing cu a pa nih order a chuah i, hipa hi rili cung tinbaw chung ah nan khumh lai, a thih tiang a ei din ding nan chiah piak lai i, rili ah nan fenh ter lai tiah a ti hna..A pa hi Nebukhanezar siangpahrang a lo, a sual tuk. A bia bang in thil cu an timh piak i, tinbaw chung ah cun an khumh. Thlalang awng pakhat te khi an tuah piak, nungak nu cu rili kam lungpi cung ah tthu in mitthli he…
Tlawmpal ah tinbaw cu rili nih cun duhsah in a kal pi. Thla lang awng in tlangvalpa nih cun mitthli he a donghnak kut a van zauh. Nungak nu zong nih cun sianglo buin a kut te cu a hei zauh ve i, cu ti cun duhsah in an i hlat riahmah. Nungak nu cu tlangval pa tinbaw lei zoh cun ngol hngal loin a tap. .Cu ti i, a ttah ciahmah lio ah cun tinbaw cu kut tum tia lawng khin a lang cang. .Cu tlawmpal ah cun a lo thai, mit nih a hei hmu kho tilo.
Tlangvalpa cu vawlei a langh tilo nak Rili laicer a phan.Tinbaw chung ah a chanchung eiding an chiah piak ko nain, a caah san a tlailo. A damnak si tha bik cu chiah piak mi eidin kha silo in a dawt bikmi Hurry nylon kha asi deuh.Zanlei nitlak lai ah khin a tinbaw thlalang awng in khua a cuan. Nitlak lei vankam sen nawn khin a hei hmuh. Zanlei ninem lawm in va phuntling hna cu Rili cung ah an zuang hna. A can ah a dawtbik mi zuunthli nih kik siarmar in a van hranh.A liamcia mi can chung ah a ton mi vialte pakhat hnu pakhat in athinlung mitthlam ah an cuang. Chungkhar tling in nichuah lei siangpahrang pennak tang ah nuam te i, an rak um lio ah an chung ten thah dih ding an rak si ruang ah, nitlak lei ram ah an rak zam. Lampi ah tilian nih a fenh hna i, an I bochan bikmi a pa nih a thih tak hna. Hi ramchung ah hin hna ngam tein kan um rua lai tiah an rak i ruah. A si nain an i ruah ning in a si lo. Atu cu minung hawi umlo nak a kau bikmi Rili laicer a phan than cang. Hi thil a tonmi vialte hi a tuar khawh men ko hna lai. Nain a dawtmi he zungzal an i then dingmi cu ruah thiam awk a tha hnga maw. Cu lawng asi lo, thlanmual lei hoih in a ke a hlang cang mi a dawtbik a nu teh zeitin dah a um lai ? A umlo hnu ah a ho nih dah a zoh lai ? Tlangvalpa nih hin nun maw ai thim ah a that deuh lai thih dah ?Nun a thim zong ah a dawtbik mi Hurry nylon cu a tong than kho lai maw? Sunghno a nu teh a zohkhenh than kho lai maw? Thihnak le nunnak kar a ri ah a dirmi tlanvalpa thinlung khi zeidek a hei lawh hnga mu ! A awlawk chawn le sivangh khi zei dah a lawh lai ! A nunchung vialte minung hawi umlo nak hmun ah thin sivang i khuacan relding hi asi kho lai maw ?A thuk bikmi Rili chung ah khin zuang in vawlei harnak le mitthli tlak nak ram hi kaltak cang sehlaw a caah a tha deuh ko lai. Zei sualnak hmanh a neilo mi tlangval pa rili a fenhter tu nungak nu a pa hi thlachiat a ruat lo tuk ee. A pum cu a hlat nak bik ah fenh ter asi ko nain, a thinlung cu a dawtbik sin ah a chiah ta.
IX
Nungak nu cu zeitluk rawl thaw an pek zong ah a ei tilo.Mitthli lawng a rawl ah an cang. A pa nih a ramchung nih chuak siam thiam a auh hna, a lomhnak ding an tuah piak san a tlai hlei lo. Rawl a ei lo nak ni 35 asi cang. A pa a lungre a thei, a der tuk cang. A hawikom kip a auh hna, a phunphun in an hnemh san a tlai lo. A dawtbik zun tuar in a hram mi Hurry nylon caah cun a pa ramchung um, capo siam thiam le hlasak thiam hna cu darkhuang tumthawng bantuk ah an cang. A nu ngeih ruang ah a ttap mi hngakchia cu a nu kawh piak lawng ah pei a ngam lai cu !
Siangpahrang pa a lung a dong cang, a fanu dawt a dam than nak ding ah cun a hauh mi a tuah piak lawng ah a dam lai. A ramchung pa vialte a kawh dih hna hnu ah a tlangvalpa nan va kawl than lai tiah a fial hna. Nungak nu nih cun an hmu lai ti a zum hna lo. Kawl an i thawh lai ah mipa pakhat hiti hin bia a cah.. Midang cu an lung a dong te lai i, an rak kir dih te ko lai, nang cu ka tlangval pa na hmuh hlan lo na rak kir lailo tiah a cah ta.. Ramchung pa vialte cu tlangvalpa kawl ah an i thawh. Ni li hrawng a rauh ah cun a zat ceo an kir , zarh hnih a rauh ah cun an lung a dong i an kir dih. Nungak nu nih bia a cah tak mi pa belte kir tilo in a va kawl peng. Thla ruk a rauh hnu ah tlangvalpa an fenhter nak tinbaw cu a va hmuh,tlangval pa cu a hei auh, na dawtbik mi Hury nylon nih nangmah kawl ding ah a ka thlah, rak chuak law na dawt bik sin ah kir than ding in tiah a kawh len nain chawntu a nei tilo. A tinbaw chung cu maimomh baw a kenkip ah an i zam, a rak buar dih,tlangvalpa a rak um tilo. Minung um tilo nak sauh ngai dawh si cang.A ihnak chantling tang ah cakuat pakhat te a hmuh i, a rak kir.A chanchung a dawtbik he i then i, Rili cung ah damchung ni, umhar lileng le zun ngai in umnak cun Rili chung i, a zuan cu a caah a tha deuh ko hnga lo maw ! Ti toih tu a neilo mi pangpar cu a thi tawn…
X
Nungak nu nih cun ka tlangval zeitik dah a rak kir lai tiah lungdong loin tiva lungcung in a rak hngah .. Nikhat cu a fialmi pa rianrang nawn i a mah lawng a rak kir khi lamhla nawn in a hei hmuh. A dawtmi a tel tilo. Mipa nih a van phurh mi cakuat cu a van kau i,
Ka dawtbik mi Hurry nylon,… kan pum cu nikhat hnu nikhat in i hlat chin lengmang hmanh sehlaw, kan dawtnak cu nikhat hnu nikhat in a fek chin . Hlan i ka biakamnak nan dum chung pangpar hna kha rak zoh than hna hmanh, zan dang nak in an par an i dawh khun lai. Kan dawtnak cu chim kho hmanh hlah ninglaw, nan dumchung pangpar hna nih khan nifatin dong loin keimah can ah an chim cang lai. Hi ca na hmuh tik ah cun na dawtmi kei cu vawlei ah ka um ti lailo. Vawlei cu tah aihram nak le then nak ram asi bang in ka dawt, ka pum nih cun an kaltak ko nain, ka thinlung cu kai kalpi kholo. Ka pum cu rili ah a zuang ko nain ka thinlung cu ka zuan pi kholo,ka dawt bik na sin ah ka chiah ta. Ka thlarau cu a ka sertu pathian sin ah a kai ko lai nain,ka thinlung cu ka kai pi kholo ,ka dawt na sin ah ka chiah ta. Van mithiang hna lennak ,then nak a um tilo nak van ram khin ka rak in don te lai i, kutsih in kan leng than te lai mu………Cu tik ah cun a tu i, kan ngaihchiat nak vialte hi kan philh dih te hna lai ka dawt.
A zan cu a dawt bik mi biakamnak an dum pangpar hna le zandai tang zilthli lak ah mitthli he ….. Zan dang nak in an dum pangpar hna cu an i dawh khun taktak. Hlan i nau bang an rak i pom tawnnak ,dawtnak bia an rak i kamh nak, an thut nak hna cu a tu ah cun mitthli he ka dawt tiah a ttah nak hmun ah an cang cang. An hmaitlang i,ramriak mei ceu tete a hei hmuh than hna, a dawtmi lawi rih hlah tiah a rak thlauh i, zinglei mei ceu an si rih lo, zan mei ceu an si ko rih, a tuan tuk rih a rak ti lio can kha a thinlung ah an thar than.An dum chak lei a hei zoh. Tlangvalpa bia a rak kamh nak thingkung zong nih cun zan dang nak in a hnah an hninghno i, a dawh khun in a hmuh.Hlan ah cun an dumchung pangpar hna cu a thinlung hnemtu an rak si nain, a tu ah cun a lungfah zual tertu le a mitthli tlak tertu ah an cang.Zan dang i a ceu tawn mi zan thlapa hna le van arfi hna cu a nih caah cun an ceu tilo, an mui dih hlah maw ti awk khin..Hi hi maw dawtnak vanchia timi cu a rak si !
Rili ti khi ca hang ah hmang in hi hna dawtnak hi tial hei sihlaw cu zong nih cun a daih lailo ee….
An pum cu i then ko hmanh sehlaw, an thinlung ah an cinta mi dawtnak cu zungzal in vawlei dongh tiang a thi ti lailo.
Siangpahrang thawn nak nih an pum cu then kho hmanh sehlaw, an i dawtnak cu zeitik hmanh ah an then kho hna lailo…
.......................................................... Dawtnak vanchia ......................................................
By : Danny patawn ..
