Dawtmi sin ah ka kir than ti lailo
By : Danny patawn
November 8, 2010
Siangin khar tthal chuahka hrawng asi. Ka nu nih a ka timhpiakmi ka ruksai khat nawn in ka bai i, nitlak thlanglei ah khual tlawn ah ka thawh. Ka nifar, ka nule ka pa, cingla rualchan vialte nih thlanmual tiang an ka thlah. Hringtu ka pa cu a catial hmanh aa thei tilo mi lungphun rop cung ah thiangthunh he dir in.... ka fa nang le kei cu a tu hi kan i hmuh donghnak asi cang ko lai. Ka tar cang i, kan hngak khawh ka zum tilo. Na rak tlun tthan tik ah khin cun lei kik tang ah ka rak ciam cang lai. Khawzei na phak hmanh ah nile far, nule pa van kan philh hlah mu.... Ka nu lei ka van hoi cu a fapa hi a ruak in hlahmaw a rak tlun ti awk khin. Ngol hngal loin a ttap.Dawtu hawikom vialte an tling. Hawikom tthenkhat nih lampi lakphak ti dinnak phaisa an ka rawnh, Arti pum tete an ka sanh.I sianglo buin tthen nak kut kan i tlai hna i, duhsah in kan i hlat riahmah hna. Ka ke nih cun hmailei a hlan ko nain, ka thinlung cu hnulei ah hlah maw a kir ti awk khin.....
Khualtlawng choklet tonding le mi thawngpang theih ding an umlo. Lamchak lamthlaang ah ka thawngpang thei in a permi Cepa thawng dah tilo cu.. Mahlawng khualtlawn cu umhar a zual, ruahmi a tam. A caan ah dawtu hna he rak lennak nehhnu ka hei khirh. A can ah ngaknu he ngahring kan rak dawi lio, tthalcaan ah kehthei le khuhlu kan rak hrawn lio, dawtkhunmi he zanlei ninem lawm in, vawlei cung ah midang an umle umlo hmanh theilo tiang i, zalam lenlio caan vialte pakhat hnu pakhat in ka ruat hna...Dawtkhunmi kong ka ruah caan ah hin cun cho nilin i, ka kai cuahmah zong ah chuk ah a zuangmi ka lo. Cu ti cun nehhnu thil hna cu ka khualtlawn hawi ah an cang.
Cu ti i,khua ka ruah lio ah cun minih pal tuklo mi tupi tang ka phan. Dai demduam in a um. A linsa mi ka taksa duhsah in a hung kik riahmah. Chun asi ko nain khuangterit an awn. Khua a mui lai dingmi alo. Tlawmpal ka kal ah khin lamchak in lamthlang ah ..vung.. tiah a permi ka hmuh, zei asi ka fianglo. Tlawmpal ah minung raak thawng ka theih. A caan ah bak huahmah in a ni mi thawng hna ka theih. Ka mitthlam asi hnga maw...ka hmai hin mi pakhat nih a tu le a tu lam a ka tan. A caan ah ka thaphet hi rak ka lam sehlaw ka lawhter.... Chun nilum saling asi ko nain, ka khuasik saisem a chuak, angki leng ka hlam..Tupi tang ah cun mit hmanh fak au ngamlo in a tlik in ka tli....
Zanriah chumh cu hrawng khi asi cang. Tlangpar ka phan.Ka ba ngai i, thingkung nganpi tang ah ka ruksai hngauh in ka din.Ka nu nih lampi na din ding ah tiah a ka rawnhmi arti hring pumkhat kai chuah i ka din..Khua ka van hoi i, ka tang ah khua pakhat ka hei hmuh.. Cu khua cu a dawh hringhran..Nichuah lei ah Tiva pakhat a luang, cu tiva pawngkam vialte cu leikuang le hramh hring lawngte an si..A caan ah thlizil nih kui hniakmak in a van hranh hna. Chaklei tlang cu Faiceu le Vaurawng par nih a thuamh i, zoh cimlo an si. An inlo a ttha.Tlangcung khua ka hmuhmi ah cun a dawhbik asi ko lai.. Pathian nih hawihlei in a dawtkhun hna hlahmaw ti awk khin...
Khua zong a tuan rih ko i, cikkhat in van zau ta ning ka ti. Ka ba pah ko rua. Ka mit duhsah in ai chin. Ka hgilh lai ka ti ah khin hngakchia ttah thawng nih a ka hlauh. Tah sawhsawh asi lo. Thil pakhatkhat tong sehlaw ka dawhter..Ka tho i, hngakchia ttahnak lei ah cun ka vung kal.. Inchia nawn a lang in ka hei hmuh. A vampang cu kawm chung erh khawh lomi vokpi sual hna cu a duh tik poh ah luhchuah khawh ding khin an awng...Meheh chin chin cu chim hau lo... Cu inchung i a ttap ciahmahmi hngakchia nute ka hmuh cu ka thinlung mitthli a tla. Tuanglai ah a ril ko mi nu pakhat ka hmuh tthan. Hngakchia nute a nu asi. A angki le a hni an tlek ning le tteh ning cu chim vima awk tha asi lo. Ka kawh len nain, chawntu ka neilo. Ka van naih deuh, ka lung a hring chin. A taksa ka van tongh cu pathian nih arak pekmi thaw le nunnak nih a rak kaltak diam cang.
Thih hi zei dah asi ti hmanh a thei rihlo mi hngakchia nute ka van zoh, ka lungfah ka celhlo. Nute ttap ti hlah, keimah ka um ko, tiah ka zal in tthangiah le changreu ka van chuah i ka ei ter. A rawl a rak ttaam ngai rua, cikkhat ah a ei dih i, a ttap tthan. Nute,,, na nu hi zeitik in dah hi tihin a um tiah ka hal, ... Zan ah kan it le zing ah ka thawh lengmang le a tho tilo.A ka chawn duh tilo. Ka nu zeitin dek a um a ti... Ka nu nih a ka thih tak cang ti hmanh a thei rihlo mi hngakchia nute kong ruah ah cun lungfah celh ding a silo.Zei sualnak hmanh a nei rih lomi hngakchia nute cung ah a phurh khawh lo ding tiang tiang i, vanchiat nak a tlun mi ka ruah ah sertu pathian ka mawhchiat. Nule pa, ule nau loin hi hngakchia te hi zeitindah a um khawh lai ti ka ruah ah ka mit a mui. A nu nih hi nu a pawi lio ah hin a pa nih an khuakam tiva ah a rak thih tak cang hna. An mah nufa lawng an rak hmei..
Intung kai hngauh i, khuaza ka ruat. A caan ah Sertu pathian sin ah ka vuivai. Misual le chung le nih celh lomi hna cung hmanh ah hi bantuk vanchiatnak tiang hi a tlunglo. Hi hngakchiate nih hin hitluk i a ritmi ngeihchiat nak hi zeitindah a phurh khawh lai ka ti. Zei ruang ah dah khuami pakhat hmanh an chuahlo timi ko nih a ka buaiter. An theihlo bia maw asi ? an chuah duhlo dah ! A zei si poh ah hiti hin cun zohsawh awk a ttha lo. Khuami rianrang in ka va chimh hna a hau ka ti.Rianrang in ka va chimh hna hnu ah hngakchia nute sin ah ka rak kir tthan. Hngah len zong ah an chuak tilo.An rak theihlo ruang ah si dawh a silo. Zanlei ni a niam ruahmah cang..Van tthat ka ti lai maw vanchiat ka ti lai dek,thlan co kholo ding tarnu pahnih an hong chuak. Ruakvui nak ding ah vai tuhmui hlan ah ka vak. Thlancawh an i thawhlo hlei ah an thil hlan hmanh ah cun an kamkau har ning cu a mak. Zei bantuk lungput khi dek an neih hnga ..
A nu cu kai puak. Nute cu a kut in kai hruai. Thlancawhnak thilri kai put pah rih..Thlancawh manhlo le ruakvui manhlo lai phan tuk ruang ah asi rua, cikkhat ti awk ah khin ka lim..Cikkhat ka thabat ka van i damh. Ruakvui nak ding ah ka Bible cauk ka van kau ah khin nute nih cun ka nu hi zei tin thla na tuah lai? tiah a van ka hal... Na nu cu pathian sin ah a kan kal tak cang lai. Cu caah cun thlahnak kan tuah lai tiah ka leh. Pathian cu khawika ah thla a um ? avan ka ti tthan.Nute,vancung sangpi ah khin a um .. biahmanh ka chim kho tilo. Kham awk tthalo in ka biang ah mitthli dapti bang an luang...
Ruakvui nak ding ah Mathai 5:4 ka rel.... A tap a hram mi cu lunglawm mi nan va si dah ! Pathian nih an hnemh hna lai..Anu cu krifa phungning le mi sining in vui ding ah hiti hin bia ka chim. Nute nu, a tu caan hi pumsa sinak cun kan i then caan asi cang. Minung mit hmuh ah cun Nute le keimah lawng kan si nain, thlarau mit in cun mi tampi nih na thlantlang in kan in thlah ko. Vanmi thiang hna nih an kan telpi ko, na sia van herh hlah mu. Kan ṭah aihram nak Bawipa nih a theih i, a kan hnemh ko ee. Na kaltak mi na fa mitthli hnawh piak ding ah Bawipa nih a kan hngah peng ko. Nang cu vawlei aihram nak chung in na chuak cang lai i, van mithiang hna lennak ram ah khin na kal cang lai. Nang cu leidip in sermi na si bang in leidip ah na kir ṭhan cang lai.Bawipa nih an pekmi nunnak cu a lak than cang. Vungkal ko nelaw, Van kutka khin rak kan dong te mu.. Thlahnak kut thlir can ah khin nute nih a thlir nak caang a thei lo i, kei mahlawng thlahnak kut thlirtu ka si. Vawlei cung ah krifa phung ning in ai vuimi lak ah thlahnak kut thlirtu nei tlawm bik asi ko lai dah! A thlan ah ...Na sia van herh hlah mu nute nu... ! tiah ka tial. Pangpar kungkhat te ka cinta i, tlun ah kan i thawh.
Lawi pah cu a cho cang i, nute cu kai puak. Holh thiamka asi nain a fim ning hi ka khuaruah a har..Hi tihin bia a ka ruah pah.. Ka pa kan ti laimu...aw na pa pei ka si cu nute... ka nu kha pathian sin ah a kal lai na ti ! Zeitik ah dah a rak kir ṭhan lai ? A rak kir ti lailo nute, kan mah hi asin ah kan kal te lai... Ka nu a kir tilo ah cun na ka kaltak tik ah zeitin thla keimah lawng ka um lai ? Nute kan kaltak lailo ka ti vial ah khin holhnak thazaang ka nei tilo...Ka lungfah ka celhlo..
A zan cu topi tu a hotal an chuak hnga maw ka ti,. Midang an chuahlo cem hmanh ah pastor , krifa upa le mi piangthar pahnih khat tal cu an chuak te ko hngalo maw ka ti.. Zan riah ei khim hnu zong ah cun a ho thawng hmanh a lenglo... Tlawmpal ah khuangtum thawng a hung thang.. Nute cu ka nu nih a ka rawnhmi arti pumkhat ka chumhpiak. Khim tein rawl ka pek hnu ah a thaba lai tiah ihphah ka tuahpiak i ka ihter..A phun phun in ruahlo le ruahlo tiang in khua ka ruat. Ai pum mi hlasak thawng cu ngaih a nuam hringhran. An halellujah ṭhat ning le an ṭuul ṭhat ning cu a mak. An phungchimpa i mica nun kong a van chim ko ah hin a thiam khun. An Amen thawng nih in a khehlo lawng...
Cu zan cu an thlacam, hlasak le mica nun sermon nih khuaza a ka ruahter i, zinglei deirel arfi chuah tiang ka hngilh kholo... Ziah, mica nun kong an chim ah an thiam tuk. Nihin thlancawh le ruakthlah ah pakhat hmanh an i thawh nelo? timi le in khek deng tiang in Amen petu hna teh, topi ah pakhat hmanh an i thawhlo ? timi pawl nih ka lung a ka tuaituk ...Cu ti i khua ka ruah lio ,zinglei fingrei cah hrawng ah khin fale zuun ngai in tthal caan chuah poh ah a hraam tawnmi fiakfai va nih kai dinhnak thingkung cung in khing riahmah in a hung awn..Midang kong ka ruahnak ah keimah kong hmanh kai ruatmanh tilo. Khua nih a ka dei phuat. Hngakchia nute hi ka kaltak lai maw ? asi lo ah ka umpi lai dah ! tihi ruah hmasa cemding asi nain...Ka khualtlawn lam zong a dong rihlo nain, zohkhenhtu neilo, ngakttah, Nute hi zeitindah ka kaltak khawh lai ? Kaltak cu asi kho lailo tihi khuadei hnu a donghnak ka biachahmi cu asi....
Thlakhat hrawng kan um ah khin mi muichia nawn nu a rak ra. Ni hin ah nan in hin chuak cang uh, leiba ah kan tlaih hna ti asi. Umnak kan nei hoi tilo.. Rianrang cun umnak in cu a um tilo i, tuzan te cu kan riahter ko tiah nawl len zong ah a duh naisailo. Ziachiat le ṭhatlo zong ah a cin le tawk hi a um...Cu zan cu kan pafa in intual ah kan riak.. Ka chuahka in ka ruah ballo mi vialte ka ruat thlu.. Khuangbai le khuangte rit onh thawng nih a kan thlim ruang ah maw asi ? Silo ah Nute nu rauthla nih a kan thlim ruang ah dek asi hnga! Zandang nak in kan mitkuh a thaw khun.
Athaizing cu nan kawmtang ah rak kan umter ko uh, in ka sak khawh hlan cu tiah ka nawl lengmang hna cu an hmur an ka euh hnawhmi dah tilo cu..Ka beidongh i a ruah awk ka theih lo hnu ah khin Rual Tlirh nih ka intang ah hin rak um chung ko uh a ka ti. Cuka ah cun kan pafa in kum 2 kan um. Mi kawmtang um kan ti cu an kan nehsawh ning a zual. Keimah an ka nehsawh le zei i an ka rel lo cu ka tuar khawh ko . Nute hngakchia dang he lente an i celh can ah hin, khualpa fa, nule pa neilo an ti. A ṭah bu i a rak lawi tawn ah hin ka lung a fak tuk tawn. An fale zong cu an nule an pa maw an lawh hna zeidek an ziachiat ning hi a mak. Hiti i mitthli he a rak lawi can ah hin.. Nute na ngeihchia hlah, siangin kan kai ter lai. Nule pa neih hi mi teinak asi lo. Fimthiam nak neih hi teitu sinak asi deuh. Catang sangpi na neih tik ah cun nihin i, na mitthli an tlak tertu hna hi na hmai ah an kun than telai. Ca fak piin nai zuam lai mu tiah a mitthli hnawh piak pah khin ka hnemh tawn.
Nihin cu nute nu i a kan kaltak ni camtuak asi. Nute kai hruai i, a nu thlan ah kan va kal. Ca ka rak tialmi hna kha an rak i thei set tilo. Pangpar ka cinta mi tu cu a rak i dawh hringhran. A nu nih ti a rak toih tawn ko rua. Kan pafa in a thlan ah khupbil in thla kan cam. Nute thlacam mi nih ka lung a ka suk tuk. Hiti hin thla a cam ve.. Bawipa .. ka pa nih na nu cu nangmah sin ah a um ati. Van kir ter cang Bawipa. Mi nih nu neilo, khual pafa an ka ti lengmang. An ka nehsawh tuk, an ka vuak lengmang. Ka nucu um sehlaw an ka nehsawh ngam lailo Bawipa. Ka nu ka ngai tuk cang, van kirter cang mu Bawipa..tiah a mitthli he thla a cam ciahmah .Nute thlacam thawng cu ka thinlung ah khuari thawng nak in a thang deuh.Thla hmanh ka cam kho tilo. Ka mitthli a luang thluahmah...
Voikhat cu insaknak thing ka kawl pah ah Vom lian taktak mi ka kah. Cu zan cu ar sanpioh khap kua bel in ka chuan i ka lawm ka ti cu a ho hmanh an chuak duh hoilo. Nute he lawng cun khap kuabel sanpioh cu kan i hunh. Kan mah lawng cun thlathum hmanh ah ei khawh ding khi asi lo. Ka sanpioh vialte a hlei viar.An hlim lam le an pianthar hi zeiti pianthar khi dek an si kai fiang lo. Kan piangthar e,khamh kai fiang e nan ti ,na inpa nih vom a kah zan ah na hngilh kholo tiah phungchimtu saya pakhat bia hna ka lung ah a chuak.Minung kho, ka incung pa Rual Tlirh nih Sakhi a kah hmanh ah in tlumlo in an chuak.Ka vomhnit man cu nute siang in kainak ah thingkuang taw ne ah ka chiah.. Nichiar hi mi in kip ah kuli ka tuan. Mi dum kulh kai hlawh. Kahcham cawh tiang in. Ka hmuhmi hnihkhat tete fel tein ka khon lengmang i, mah ai veng kho dirhmun ah kan hung dir..
Job nih ka ni le caan hna hi nu thiamfung khawh bang a tlik in an tli a timi cu a hman tuk. Hika khua ka umnak kum 10 a tling manh cang. A nungcang kho dirhmun ah kan pafa kan hung dir hnu cun sakhi ka kah hmanh ah in tlumlo ti awk in an chuak. Chungkhat sahlawh an karh lulhmalh. Intual i kan rak riah lio ah khan cun ka phunhawi an um lo nain a tu cu an tam taktak cang. Nain, vom ka kah lio i, ka sanpioh khap kuabel khat i a hleimi kha cu ka mitthlam ah a cuang peng..ka philh kholo..
Voikhat cu restaurant ttha ngai mi pawng ah kuli rian ka ttuan nak ah nungak pakhat a rak ra. A dawh ning cu Lasi nungak hlah maw ti awk khin . Len a rak ka sawm. Kei nih le ka thil hnawm le ka thlan he. Ka ningzah tuk ah ka thlan hripi nih a ka paih. Voidang ah si ko seh ti zong ah a duh lo. A hmurka thlum ning le nem ning cu vanmi bang. Rawldawr nganpi chung ah cun ka kut hnawm ka bawngbi ah i hnawh pah khin kan lut.
An tthutdan le cabuai zoh ah hin van tthut ding khi ka thling hna a za . Mi kawmtang i kum zeimawzat a ummi caah cun ka mawhlo ka ti pah.. Tlawmpal kan tthut ah khin a pum chung ah hin dawhnak phun a tlingdihmi Lasi nungak nih hi tihin . Ka ṭa,... hika i kan auh nak hi kan dawt ruang ah asi. A tu ri in nang le kei cu thlankhur tiang dawtnak in phah mi pangpar lamcung ah lungkhat in kan leng tti lai a van ti cu shock ka ngahlo lawng. Ka mang asi hnga maw tiah ka hnakhaw hna ka merh, asi fawnlo. Kei cu mi kawmtang ah inle lo hmanh neilo in a ummi ka si. Na caah cun ka tlak lo ka ti.Duhnak karlak ah milian fa le sifak fa a umlo. Na si nak kha ka duhmi silo in nangmah pei kan duhmi cu na si cu.. a van ti ah cun nilin rian ka ttuan nak in ka thlan a chuak tam deuh..
Dawtnak nih a thukbikmi thinlung chungril ah hram a thlak cang hnu ah cun , cu dawtnak mi ṭeem cu a fek tuk hringhran. Limpi nih sa a hamh bang khuazei hmanh ah kal khawh asi tilo..Dawtnak hri hi mit in hmuh khawh asi lo nain Paul le Silas, Rom ralkap pawl nih thong an thlak hna i, an kutka tawh hrenh nak thir cincik nak khan a fek deuh lai dah. Dawtnak nih cun thin le lung le nunnak pek tiang a sian. Kei zong nih ka dawtbikmi caah cun ka neihmi vialte ka den dih.Nute siangin kai nak ding caah tiah ka vomhnit man thingkuang tawne i ka chiahmi tiang in ka den viar. Dawtbik mi he lungthin khat in lenlio ahcun meitlang hmanh nih kan puah hnawh sehlaw kan thei hnga hmemaw ti awk in.Na nu maw na dawt deuh Lasi nungak tiah biahalnak umsual sehlaw Lasi nungak ka ti men hnga ! Chuur hmanh nih a nu a philh lo.Kawlrawn a den cuahmah mi a kaltak ti ka ruah ah Lasi nungak i thim ding cu ka siarem setlo.Ka pa nih nule pa le ni le far na van philh hna lailo tiah mitthli he a rak ka cah mi cu a zei nemmam. Pasal an neih le neihlo hmanh ka thei ti hnalo.An dam le damlo cu um rihseh, an thih le nun hmanh ka thei hnalo.Ka philh viar hna.
Ka neihmi vialte a dih cun nute ka cawm kho tilo i, ngakttah siangin ah ka va chiah.Kei mah zong cu riantuan zong huam tilo in nichiar dawtmi zuun ka tuar. Rawl ei kar te hmanh khi hmu loin ka um kholo..Duhsah in ka thilpuan an ṭet. Ka kedan hri an cat i, puanchia in ka sih cang hna. Ka sining le ka dirhmun a chia deuh deuh,ka chungkhat sahlawh nikhat hnu nikhat in an tlau. Ka phunhawi an um tilo. Dawtmi he kan i hlat chin lengmang. Lasi nungak he i ṭhen nak cun chung le he i ṭ hen viar hmanh ka duh deuh.Kedan hri cat he um cang hnu ah cun ka fa nute ka va veh can hmanh ah hin a rak ka zahpi cang. Ka pa ti hmanh a ka ti ngam tilo..Lasi nungak zong cu zarhkhat ah voikhat hmanh ka tong kho in ka hmu kho tilo...Sifah le santlaihlo hi dawtnak hri chat tu, thentu tivapi bantuk a rak si..Ka ngaih tuk celhlo ah an in hmai hna ah ka va riak tawn. Dawtnak nih van tteek tla bang thinlung ah rian a ttuan hnu ah cun a mui ka va hmuh khawhlo zong ah an in tual i ka va riahmi hmanh cu hawikom ttha ttha nih an ka hnemh mi nak in ka caah cun a sunglawi deuh in ka thei..
Voikhat cu zu langkhat kai cawk i, hlan i ka rak i dinh nak thingkung nganpi tang ah khan dawtmi Lasi nungak umnak lei hoih in ka va tthu. Dawt khun mi zuun ngaih cu hmurka nih a chim khawhmi nih cun zeitik hmanh ah a daih lailo. Thinlung hi a kek kuai dih hlah maw ti awk khin. Cu zong nih cun a tlinh kho tthiam tthiam lo. I tonghnak hmun kip hi a fak dihmi an lo.. Vawlei cung holh phun vialte zong fonh in chim si ko hmanh sehlaw tlamtling cun a chim kho lailo...
Ka zu ka din pah cun hi tin bia ka chim...Nule pa, nile far ule nau, an thih le nun hmanh thei lo tiang le thiltlek he lamkam ah a ka riah tertu, zuhmun, sahmun ah a ka luhpi i, a nauta bik , nunman neilo dirhmun le Cawmtu neilo, a nu nih a roh takmi Dawt Tha Hlei par cawm kholo tiang tiang i muihnak chung ah a ka luhpi tu dawtmi sin ah cun ka kir than ti lailo ka ti. Mahvial ah cun mitthli nih biangno cung in …….
Ka Telephone a hung ring, zinglei suimilam 9 asi cang.....
