A dai zan ! A thiang zan ! ( Silent night )
1 December 2011
By : Danny B. Thla Tawn
Hla vialte lak ah A dai zan ! A thiang zan ( Silent Night ) nih hin hlah maw mi thinlung a hlauh bik ko rua ! December thla a hung chuah cun dawr lian pipi chung luh tik ah hi hla thawng nih hin thinlung a daih ter khun . Vanbawi fa chuahnak Bethlehem le meiphu kau in ramtang ah tucawng pawl hna kha mithlam ah a cuanter hna.Van mithiang hna hlasak thawng kha hnathlam ah khing riahmah in..Cu lawng silo, zumtu hna thinlung zong Bethlehem lei a hei hoih ter fawn.
A dai zan ! A thiang zan …. Hi hla hi Austria ram Oberndorf khua ah Joseph Mohr nih Germany holh in 1816 ah a rak tial. 1818 ah cawng saya Franz Cruber nih a aw a rak tuah. Original German holh in.. Stille Nacht ! Heilige Nacht …. ( A dai zan, a thiang zan ti nak asi )
December 24 zan, 1818 ah St.Nicola biak in, Oberndorf khua ah hi hlaphuah tu hna nih a hmasabik an rak sak. Hi zan ngelcel ah hin an rak i tum tawn mi an Organ neih chun te cu a rawk i tum awk an rak neilo.
1890 kum ah Salzach tiva lian nih an biak in hi a rak hrawh. Kum sau nawn sa kholo in an rak um. Kum 34 a rauh hnu, 1924 ah sak hram an rak thok i,kum 13 an rau.
1819 ah Rainer le Strasser hna nih Europe , Germany le North America hna ah an va sak . 1839 kum ah New York ah an phak pi .Nihin ah cun holh phun 300 renglo in an leh i, biak nak phunkip nih an sak duh bikmi le mi thinlung a hlip hlau tu bik ah a cang cang. Hi hla an phuah nak hi kum 193 asi cang.
A dai zan ! A thiang zan ! vawlei cung ah an sak hmasat bik nak khua hi a tu tiang ah minung 5601 an um i, khua fate asi rih.Czech Republic khua lian bik pahnih nak Brno in 453 km, motor in suimilam panga kal asi. Berlin ( Germany ) in 739 km a hlat i, motor in suimilam 7 kal asi. Geneva ( Switzerland ) in 745 km a hlat i, suimilam 7 le 36 minutes kal asi.
A tang Biak in fate hi A dai zan ! A thiang zan ! ( Silent Night ) an rak sak hmasat nak St. Nicola biak in cu asi.
